فتح مخك تاكل ملبن !!

قال الملك رمسيس الثاني لروكا الحرامي :
علمت أن مصر تحتل المرتبة 105 من بين 165 دولة ينخر في عظامها الفساد .
قال روكا :
ده كلام خواجات يا عم رمسيس وسيادتك عارف انهم بيحقدوا علينا
وبيحسدونا على الهنا اللي احنا غرقانين فيه لشوشتنا .
قال الشيخ غريب :
بيحسدوا القرد على حمار ايده !
قال روكا :
سيادتك واقف في الحتة المقطوعة دى ليل نهار .. هل شفت حد فاسد ؟
بلاش الحتة دى ، اقف سيادتك في ميدان التحرير وزعق وقول الفاسد يرفع ايده
ولا واحد حيعبرك ويرفعها لإنهم ما يعرفوش يعني ايه فساااد
ما تصدقش الخواجات يا سيادة الملك لإن الحكومة مستفلسة
قال الشيخ :
قصدك مستهدفة يا معلم !
قال الملك :
الحكومة لا تنفي ان هناك فساااد
رد روكا :
ما اسموش فساد سيادتك اسمه فتح مخك تاكل ملبن
اسمهشيلني واشيلك
يعني منجهني وامنجهك
الفاسد لامؤاخذة هو اللي بيقف المراكب السايرة وبيعطل مصالح الخلق
يستخسر يلطع امضته على ورقة بتلتميت فدان بتلتميت جنيه من أرض الحكومة
اللي مالهاش اول من آخر
حتبني فلل وسرايات بحمامات سباحة للخلق اللي مش لاقية ُخن يتاويها.
هو اللي بيقف زي الخازوق في سكة مناقصة طرية يتاكل من وراها الشهد.
هو اللي بيكسر بخاطر اللي عاوز سلفة مليار ولا اتنين من البنك يلعب بيهم
في السوق ومستعد يحلف بتربة باباه الباشا انه حيسدد
هو ده الفاسد يا سيادة الملك واقف للباشوات زي اللقمة في الزور
وفارش ليهم السكة كلاكيع.
بس اطمن سيادتك الحكومة رافعة سيفها في وش الفساد.
قال الشيخ :
طمنت قلبي يا معلم .
قال روكا :
سألت موظف حبيبي عن الفساد قالي ليه ده كان زمان يا معلم
كان المسؤول بيمضي الورقة ويختمه وسلم واستلم ويتلايم على
كوم البواكي لوحده ويقول رزق عيالي
مكنش بيلاغي الناس الشقيانة اللي حواليه ولا حتى بالفتافيت
كان فساد والعياذ بالله عشان كدة كانت البواكي منظورة وأول غلطة يقع فيها
ينطس عشر سنين.
ده جزاء الفاسد والعياذ بالله لكن الشفافية اللي احنا عايشين فيها النهاردة
خلت المسؤول يشتغل في النور بيقبض ويسيب غيره يقبض على عينك يا تاجر
الكبير والصغير بيدوق ويستطعم .
قال الشيخ :
لقمة هنية تكفي مية .
قال روكا للملك :
افرض سيادتك ان واحد من الناس الحلوة اللي بتلعب بالملايين استورد شحنة عدس
من بتاع الغلابة ابو 15 جنيه وافرض انها مخزونة من عشر سنين
وان السوس ضارب فيها وافرض ان مسئول الجمارك بص بنفسه فيها وقال
عالبركة ومضى الورق وقبض الحلاوة عشان بتوع الدخل المحدود يطفحوا العدس
ويملوا بطنهم ويبطلوا تلسين على الحكومة
هي الحلاوة بقت فساااد ؟؟
هو فيه احلى من الحلاوة يا ناااس !
قال الشيخ :
انت احلى يا معلم
قال الملك لروكا :
ولكنك تقول ان العدس فيه سوس
رد روكا :
السوس بيلعب في كل حتة اشمهنى سوسة العدس هي اللي كخة ؟!
ثم اشار روكا إلى الشيخ غريب وقال للملك :
الراجل الطيب ده لا من ديني ولا من دينك صريح ويقول للأعور انت أعور في في عينه
ثم هجم روكا على الشيخ واحكم قبضته على زمارة رقبته وراح يضغط بقوة وسأله :
فيه فسااااد في البلد يا مولانا ؟
قال الشيخ بصوت متحشرج وهو يكاد يختنق :
سيبني وانا اقول مافيش يا معلم

هههههههههههههههههههههههه

ههههههههههههههههههههههههه

ياكيمو ياجامد

ِكرا يا احمد على ردك الجميل